الضرائب

من ضمن المساخر اللي الواحد بيشوفها  إن فيه ناس مقتنعه إن مصر مش بس من أعلي الدول في الضرائب، لأ، دة أعلي دولة كمان.

هنعمل مقارنة بسيطة مابين مصر و هولندا في موضوع الضرائب دة. المقارنة هتكون عن طريق النسب مش الأرقام، يعني  مايجيش حد غبي يقول عبارة من نوعية "بس شوف هم بيقبضوا كام" علشان هو لو غبي كفاية إنه ميعرفش إن طالما بنتكلم على نسب، يبقي الرقم مش  هيفرق.

هنخد مواطن عايش بطوله في مصر و في هولندا، دخله يعتبر شريحة متوسطة عليا، عنده عربية صغيرة (بغض النظر جابها ازاي) و نحسب مين بيدفع نسبة أعلي في الضرائب

المواطن المصري: 6000 جنية شهرياً، يعني 72 ألف في السنة

المواطن الهولندي: 48 ألف يورو في السنة. يعني حوالي 4000 يورو في الشهر.

أولا: ضريبة الدخل

في مصر نسبة شبه معدومة اللي بتدفعها و خصوصاً في القطاع الخاص. بس هنقول انها بتندفع. هنحسب على حساب أخر شريحة بالنسبة للاتنين (الحساب الدقيق بيبقي على شرائح بس كدة للسهولة)

بالنسبة للمصري، مرتبه في شريحة ال 20%. يعني هيتاخد منه 20% من دخله

الهولندي، مرتبه في شريحة ال 38.10%. يعني قبل ما نتكلم في أي حاجة، الهولندي دفع الضعف

ثانياً: ضريبة المبيعات أو ال- قيمة المضافة

هنحسبها على الأكل بس. هنقول إن كل شخص من الاتنين هيشتري ب 25% من دخله أكل و شرب.

المصري: لو بيشتري من البقال والجزار و بتاع الفراخ والخضري و كدة، هيدفع صفر.

الهولندي:  لو بيشتري من عربية أكل في الشارع، هيدفع ضريبة مابين  10% (على حاجات شبه معدومة) إلي 21%. هنقول 20%  من 25% يعني 5% من المجموع الكلي.

الحساب الحالي:

المصري: 20%

الهولندي: 43.10%

ثالثاً:  ضريبة الطاقة:  

دة ما بين كهرباء و غاز و بنزين.

هنقول الاتنين بيدفعوا 10% من مرتبهم طاقة.

المصري: ضريبة صفر.

الهولندي:  ضريبة مابين 100%  إلي 150%,  بمتوسط 125%,  يعني 12.5% من المجموع الكلي

الحساب الحالي:

المصري:  20%

الهولندي: 55.6%

رابعاً: ضرائب متنوعة: 

ضريبة ميه و زبالة (غير مصاريف المية والزبالة): حوالي 800 يورو في السنة عند الهولندي. يعني حوالي 1.7%. المصري عنده صفر.

ضريبة طريق: مابين 50  يورو في الشهر إلي 150 (على حسب وزن العربية و نوع الوقود)، هنقول متوسط (median not average): حوالي 75, يعني في السنة حوالي 900 أو حوالي 1.9% كمان.

تأمين إجباري: المصري بيدفع 150 جنية في السنة،  أو حوالي 0.2%

الهولندي بيدفع على الأقل 70 يورو شهرياً أو 840 يورو سنوياً أو  حوالي 1.75%

الحساب الحالي:

المصري:  20.2%

الهولندي: 61%

طبعاً مش هتكلم على الضريبة العقارية علشان كدة هنوصل لمرحلة العياط!

مع العلم: 

1- هولندا مفيش فيها تأمين صحي مجاني. بندفع حوالي 130 يورو شهرياً (يعني 1560 يورو في السنة) بلاضافة إلي أول 385 يورو في العلاج (يعني مجموع 1945 يورو في السنة) و مفيش تأمين صحي على الأسنان (محتاج تشتري حاجة زي باقة بتديلك رقم تافه كل سنة). يعني  مستشفي الدمرداش و والقصر العيني والحاجات ديه اللي مش عجباك، ملهاش مثيل أصلاً هنا!

2- مفيش تعليم جامعي مجاني. يعني التعليم أبو بلاش في مصر اللي مش عجباك دة، ملوش مثيل هنا (إلا بقي لو إنت عظيم و حد عطف عليك بمنحة)

3- مفيش دعم على أي حاجة. فيه برامج حكومية للغلابة زي تكافل و كرامة كدة، بس مفيش دعم على أي حاجة! الدعم صفر!

يعني بالميت كدة، الهولندي بيدفع 3 أضعاف المصري ضرائب (دة المصري اللي بيدفع ضرائب أصلاً) و بياخد خدمات أقل منه! و لسة بتلاقي حد عنده الوقاحة الكافية إنه يتكلم على الضرائب في مصر!