ازاي اربي طفل صالح؟!
البوست دة هيكون طويل حقيقي! لو إنت أب أو أم و مش هتعرف تقرأه علشان طويل، يبقي متخلفش أحسن!
سيادتك اتجوزت/إتجوزتي (لأسباب مختلفة عن الأسباب اللي بيتجوز علشانها باقي الكوكب) ماشي، براحتكم، بس طالما قررتم تخلفوا، دة مش براحتكم خالص!
ليه؟! علشان بعيد عن انكم هتجيبوا كائن حي غلبان للحياه و إنتم مفيش عندكم أدني معلومات عن التربية، الكائن دة لو كبر من غير تربية حقيقيه، هيطلع عين أهالينا احنا!
البوست دة بوست مجمع من بوستات كتير كتبتها قبل كدة و بيلخص جملة واحدة: ازاي تربي بجد؟!
قبل ما نتكلم على ازاي، نتكلم على ليه الأول.
البداية كان بوست لواحده دكتورة بتشتكي من اسعار الحضانة وإنها بتاخد تلتين مرتبها. وطبعا أكيد التلت اللي فاضل مش بيكفي المواصلات وإنها تاكل حاجة من بره أثناء الشغل وبالتالي هي فعليا بتصرف أكتر من اللي بتكسبه.
السؤال هنا بقي: ليه بتخلف أصلا؟!
ايه حكمه إني اخلف طفل علشان في أول 3 سنين في حياته اسيب تربيته للحضانات؟!
أول 3 سنين دول هم اهم سنين في حياة أي طفل على فكرة. دول اللي بيتحدد فيهم شخصيته أصلا! دول اللي بيتم زرع أي قيم في حياته واللي بيكونوا مفردات شخصيته كلها بعد كده (هنلاقي شوية كلام علمي في المصادر في الآخر حوالين النقطة ديه).
في الغرب مثلا (بتاع اللهم هجره وكده), قرار الخلفة ده قرار صعب جدا جدا وبيحتاج بحث طويل و نقاش مطول بين الزوج والزوجه مين اللي هيقعد مع الطفل على الاقل أول سنة من عمره ومين اللي هيصرف على البيت (علشان في المعتاد بيكونوا هم الاتنين بيصرفوا على البيت), لكن في مصر, الموضوع مجرد يلا نتجوز يلا نخلف. بتيجي باكاج على بعضها كده!
تعالوا نتكلم على دورة حياة المصري في الجواز والخلفة زي ما بتحصل في مصر. ونشوف العيوب فين بعد كده.
الدورة بتبدأ لما ييجي شاب على الاغلب مش عارف يشيل مسئولية نفسه يكلم ابوه وامه انه "عايز يعف نفسه" يعني عايز يتجوز لأسباب جنسية بحته. المهم بعد البحث والتدوير, وحوارات الصالونات المعتادة, هوب, لقينا بنت الحلال, هوب, يلا نجهز شقة وعفش ونمضي قايمة ونعمل فرح وهوب بقيت في البيت وهو يمكن عليه ديون لطوب الأرض واخد من ابوه اللي وراه وقدامه
مش يهمد بقي شوية ويسكت؟! لأ خالص! 9 شهور بالدقيقه (وساعات 7 كمان), تلاقي ولي العهد شرف! مش عارف ولي العهد على ايه؟!
أول 3-4 شهور, تلاقي الطفل ده فيه بتاع 5 ولا 6 أفراد بيساعدوا فيه, وده مش وحش, بس بتلاقي بنسبة كبيرة الطفل بيرضع صناعي. طب ليه يا ستي تفشخي مناعته و نفسيته؟! أصل الرضاعة متعبه, أصل الرضاعة مش بتكفي (يعني دونا عن ستات الكوكب كلهم, المصريات بس اللي نازلين من عند ربنا الرضاعة بتاعتهم مش بتكفي), ويفضل الحال كده لحد لما يبقي عنده 6 شهور. كل تعامل الاب والام معاه مجرد أكل وشرب وكل لما يصحي يبقوا عايزين يدفسوه أكل لحد لما ينام تاني. ودمتم على كده.
المهم, لو الست بتشتغل, علشان طبعا كيانها وكده, الطفل ده ياما بينتهي بيه الحال انه يقضي نص يومه في الحضانة ياما مع امها. ترجع من الشغل طبعا تعبانة, ومش طايقة نفسها (علشان الطبيعي في مصر إن اللي بينزل الشارع يعمل أي حاجة بيرجع مش طايق نفسه) والكام ساعة اللي فاضلين ليها مع الطفل بينتهي بيهم الحال الي "ما تاكل يا زفت" أو "إن كل حياتك عياط كده! ده ايه القرف والغلب ده يارب"
وطبعا الاب على الاغلب ياما سايب النيلة ديه كلها وقاعد على القهوه ياما بيتفرج على التلفزيون ياما نايم جوه وبيشتمها علشان "سكتي الزفت ده علشان عايز أنام"
لما الطفل يبدأ يتكلم ويمشي, طول النهار يترمي قدام التلفزيون أو التابلت ويحاولوا يشغلوه بكارتون ولا باي مصيبة علشان يتهد ويحل عن سماهم ويبطل قرف. بتبقي علاقة الاب والام بيه مجرد تعليمات مجوفه لما يخالفها يتزعق في وشه ويتعاقب وممكن ينضرب وبعيد عن ده, علاقته الأساسية بالتليفون المحمول أو التابلت أو التلفزيون. مع إن طبيا ونفسيا, المفروض الطفل قبل سن سنتين مينفعش يتفرج على أي حاجة بشاشة أصلا ولحد سن 10 سنين المفروض وقت مشاهدة التلفزيون أو أي حاجة زيه تكون اقل حاجة. هتلاقوا في المصادر تأثير التلفزيون على تكوين خلايا المخ وإزاي بيبرجلها!
يفضل الطفل كده لحد لما يكمل 4 ولا 5 سنين ويدخل المدرسة. في ال 5 سنين دول ايه نوع التربية اللي اهله ربوه عليها؟! ولا أي نيلة! بالعكس, ده واخد كوكتيل زي الخرا مابين ابوه وامه وناس ماحدش يعرف عنها حاجة في الحضانة واهله وأهلها وكل واحد بيديلها قيم مختلفه وتعليمات مختلفة وساعات ضد بعدها وده بيبرجل تفكيره ونفسيته بشكل غير طبيعي!
ييجي يدخل المدرسة وبتلاقي الفرق الوحيد مابين الاهالي هو مستوي المدرسة اللي الواد هيدخلها. يعني من أول الحكومي لحد الدولي واللي في النص, تلاقي ديه الفروق الوحيدة اللي الاهالي بتقدمها لاولادها. هل حد فيهم مثلا شغل باله وعمل بحث عن خلفيات المدرسين في المدرسة ديه؟! عن المستوي العلمي الحقيقه للطلبة فيها؟! عن المستوي التربوي؟! لأ خالص! تلاقي الاهتمام بنضافة المكان والفصول وفي حالة المدرسة الدولية, هي جنسيات المدرسين! بس على كده!
تفضل ديه حياة الطفل لحد المراهقة. ساعتها كل اللي بيتغير انه لو شاب, بيخنقوا عليه شوية عن المعتاد, ولو بنت, حياتها بتتقلب جحيم فعلي وبتلاقي نفسها في سجن! تلاقي بعض العائلات بتفرض عليها لبس معين (حجاب ولا خمار ولا نقاب), عائلات تانية بتتحكم في كل حياتها بالدقيقه وكل اصحابها وكل تفاصيل يومها, عائلات تالتة كل اللي بيهمها كلام الناس, من نوعية بلاش ترجعي بعد الساعة 11 علشان الناس تقول علينا ايه, بدل ما يتقال ليها مثلا "بلاش ترجعي بعد 11 علشان كده مش امان ليكي"
الموضوع ده بيوصل لايه؟! إن الشباب ديه بتتعلم الكذب والخداع! هي أهلها بالنسبة ليها مجرد سجان مضطرين يعيشوا معاه علشان من غيره, مفيش فلوس. إنما بالنسبة للشاب, هو بيعد اللحظات اللي يقدر يخلع بيها من العالم المقرفة ديه. والبنت بتعد اللحظات لحد لما تتجوز علشان هي بتبقي فاكرة إنها مش هتعرف تستقل بحياتها غير لما تتجوز مع إنها بعد لما تتجوز بيبقي انيل من الأول (نظام إنتي دلوقتي شارع متجوزه وكده) وتخلف ونعيد العجلة اللي فوق ديه
حد من الاهالي ديه زرع في ولاده مثلا حب الوطن والوفاء ليه؟!
طب حد زرع القيم والمثل العليا اللي بتحدد قابلية أي مجتمع انه يتقدم أصلا زي مثلا قيمة العمل ولا قيمة الأمانة ولا أي حاجة من ديه؟!
طب حد زرع مثلا إنك حر طالما لم تضر وإن حريتك تنتهي عن حدود حرية الاخرين؟!
حد زرع قيم دينية أصلا (اين كان الدين ده ولو الحاد حتي) في ولادة بعيد عن قشور الدين ده والتفاهات والهجص والقرف؟!
طبعا لأ! وبينتهي الحال بايه؟! باجيال زي الزفت! اجيال لا عندها مباديء ولا قيم ولا اخلاق ولا علم ولا أي حاجة! اجيال عمليا وفعليا البشرية هتستفيد كتير لو تم إبادتهم! اجيال مهما كان مستواها المادي كلها سرسجية!
ديه مصر اللي احنا عايزينها؟
ده الشكل اللي احنا عايزين ولادنا يبقوا عليه؟!
بنخلفهم ليه طالما مش مستعدين ليهم؟!
عايزين حاجة تملي علينا البيت وخلاص؟!
لو كده بجد هاتوا كلاب أو هاتوا نسانيس! الاتنين هيملوا البيت 100% بدل القرف اللي عايشين فيه ده!
لما ناخد الدول المتقدمه اللي دايما المصريين بيحبوا يقارنوا مصر بيها (زي مثلا امريكا، كندا، أستراليا، اوروبا، اليابان، الخ)، بتلاقي معظم الدول ديه أصلا فيها انقراض لعدد المواليد لدرجه إن فيه دول بتدي امتيازات غير مسبوقه لاي حد يخلف فيها (مثلا بتلاقي دول بتدي اجازات من أول سنة كاملة بدون مرتب للأم لحد اسبوعين للأقارب من الدرجه الثانية!)، طب الناس في الدول ديه بتعمل كده ليه؟!
فيه أكتر من سبب:
1- العطلة: الخلفة بتعطل مهما حاولت تقنع نفسك بالعكس. يعني على سبيل المثال، لو أنت متجوز وأنت ومراتك بس، ممكن تخاطر وتعمل مشروع نسبه نجاحه 10% بس لو بجح، هيخليك ملياردير بس لو عندك اولاد، صعب جدا تدخل في مشروع نسبه نجاحه اقل من 95%. قيس على كده حاجات كتير بقي.
2- الماديات: الخلفة مش مسئوليه مادية وبس. ديه اكبر مشكلة بنعاني منها في مصر وهو إن أي حد معاه فلوس بيفتكر انه ينفع يخلف أي عدد من العيال. وطبعا النتيجه النهائية اللي بنعاني منها هي ثقافة السبكي وغيره وعيال اللي بيبقي عندها 10 و 11 سنة وبتتحرش بالبنات في الشارع، وعلى النطاق الاخر، الشباب اللي تلاقيه متخرج من هندسة وطب وبيدرس في جامعات زي ال GUC ومقبوض عليه بتهمه الإرهاب!
بتلاقي ناس كتير معاها فلوس وشايفة إنها بمجرد إنها تدخل ولادها مدارس دولية وجامعات غالية، إنها كده عملت اللي عليها!! النقطه ديه هنتكلم عليها بتوسع كمان شوية.
3- العدد: صدقني هو مش سباق مين يخلف أكتر. يعني لو عندك 10 عيال أنت كده مش هتثبت مكانك في التاريخ أكتر من اللي عنده عيل واحد علشان ببساطه اللي عنده عيل واحد واخد نوبل أكيد أحسن منك أنت اللي عندك 10 عيال نصهم متحرشين والنص التاني فشله!
مسئوليه إنك تجيب إنسان في العالم ده مسئولية اكبر بكتير من إنك تبني شركة متعدده الجنسيات ثمنها مليارات! الموضوع اعقد بكتير جدا من إنك تجيب طفل تعيشه في مستوي كويس وتوديه مدرسة دوليه ب 100 ألف في السنة وبعدها جامعة من اللي اسمها بيتكون من 3 حروف وبعد كده تجوزه علشان يخلف ويعمل نفس الدايره العقيمة ديه من الأول وجديد!!
طب المسئوليه ديه المفروض إيه؟! المفروض إنك تطلع كائن حي على قدر المسئوليه. المسئوليه هنا معناها كبير جدا. تشمل حاجة مهمه زي مثلا ايمانه بقيمه العمل، عن عدم الشكوي من الظروف، عن إن مش كل شوية يبقي شايف إن العيب الوحيد في الحياه هو انه اتولد في مصر وانه لو سافر بره هيبقي ستيف جوبز، عن انه ميبقاش متحرش، عن انه يبقي متقدم الفكر، عن انه يبقي حاجات كتير غير القرف اللي بنشوفه كل يوم في شوارع مصر!
طب الناس بره بتعمل الكلام ده إزاي؟! ناخد مثلا دولة زي امريكا. ناس كتير هناك شايفة إن مستوي التعليم اصبح في انخفاض دائم وبدأوا يلجأوا اللي حاجة اسمها home schooling أو تعليم منزلي. وديه حاجة ممكن تتعمل في مصر وسهلة جدا في التطبيق (كل اللي محتاجة اب وأم عندهم ايمان إن اهم مشروع في حياتهم هو الطفل اللي جابوه للدنيا ده ولو الايمان ده مش موجود، يبقي بلاش خلفه أحسن!).
طب نعمل ايه؟!
هل ندخل مدارس دولية؟!
عمليا وواقعيا كده, المدارس الدولية ايه مميزاتها عن أي مدارس عادية؟!
بيبقي 3 حاجات اساسيه:
1- اللغة: في العصر اللي احنا فيه, أنت عندك فعليا مليون مصدر لتعليم اللغات لاي فئة عمريه وببلاش! هديلك مثال بسيط مجاني 100%:
https://goo.gl/tVlZX4
2- الكمبيوتر: زي اللغات بالضبط! اللي بيخلي عيل هندي بياكل جله ليل ونهار انه يعلم نفسه برمجه وهو مفخد على الكنبه ويروح في الآخر يشتغل في الفرع الرئيسي في شركات زي مايكروسوفت وجوجل وأمازون, يخليك تعرف تعلم ابنك أو بنتك نفس الكلام بكل سهولة. برضه مثال بسيط:
https://goo.gl/rDGo85
4- إن المكان نضيف ومفيش فيه زحمة ولا عيال بتشتم ولا أي حاجة من ديه: ديه قدامك أكتر من حل. ياما تعلمهم منازل (هنتكلم عليها كمان شوية) ياما مدارس تجريبيه مش هتعدي ال 800 جنيه في السنة, ياما مدارس خاصة عادية هتكون في حدود 10% الي 20% من مصاريف المدارس الدولية
دلوقتي أنت لو عملت النقط اللي فوق ديه, أنت أخدت لحد دلوقتي نتيجة مطابقة لنتيجه المدارس الدولية تقريبا ببلاش. طب إيه الخطوه الجاية؟! الخطوه الجاية بقي إنك تعلم اولادك بجد علشان تطلع منهم ناس بتفهم مش مجرد بهايم نضيفة وبتتكلم لغات!!
هنقسم الموضوع على حسب المراحل العمرية.
نبدأ بمرحلة من سن الولادة لحد 6 شهور:
في المرحلة زيه وزي ما قلت في البوست اللي فات, الطفل بيبدأ مخة في التكون والتعرف على الحياة, وفي نفس الوقت, بتبقي اهم فترة في تكوينه الجسماني وتكوين مناعته بعد كده. في الفترة ديه, الاباء لازم يركزوا على الاتي:
1- لازم رضاعة طبيعية بأي ثمن! حتي لو تمت تعبئة لبن الام في زجاجات صناعية.
2- الكلام مع الطفل. لازم معاملة الطفل على انه إنسان عادي بنتكلم معاه وبنتواصل معاه مش انه مجرد شيء بيعيط المفروض ياكل ويشرب ونشوف هنخليه ينام إزاي
3- في الفترة ديه الطفل بيحتاج من 13 الي 17 ساعة نوم يوميا. لو تم تنظيم فترات نومه واكله والكلام معاه, ممكن تقدر بعد شهر أو اتنين من الولادة بالكتير تخليه ينام على الاقل 6 ساعات متواصلة في فترة الليل.
4- في الفترة ديه يفضل إن الطفل ينام ياما مع ابوه وامه على نفس السرير ياما على سرير ملاصق ليهم علشان سماع صوت تنفسهم بيساعده على انتظام تنفسه هو شخصيا.
5- في حاجتين مهمين جدا في العمر ده (ومنهم اللي هيكمل لحد سن 5 سنين على الاقل) ودول اباء وامهات كتير جدا مش بياخدوا بالهم منهم. اول حاجة إننا مينفعش تحت أي ظرف مهما كان اننا نمسك الطفل ونرجه جامد. زي مثلا انه بيبقي بيعيط بشكل متواصل ونهزه جامد علشان احنا متعصبين. الهزة الجامدة ديه ممكن تعمل حاجة اسمها Shaken Baby Syndrome وديه خطيرة جدا علشان بتعمل اضرار بالغة في المخ بتوصل للوفاه أو الشلل ومشكلتها إنها مش بتظهر مرة واحدة (الا لو كان العنف زايد جدا). ممكن تقرا عنها هنا:
https://bit.ly/2CDJD6G
الحاجة التانية اسمها Infant Sudden Death Syndrome أو SIDS (
https://bit.ly/2s00HxF) وديه العلماء مش عارفين ليها سبب دقيق 100% لحد دلوقتي, بس نصيحة العلماء إنك بلاش تنيم الطفل على بطنه نهائيا لحد لما يكمل سنة على الاقل. آه الطفل بيرتاح لما ينام على بطنه علشان الغازات, بس شوية غازات أكيد أحسن من الموت! وبرضه يفضل ماينامش على جنبه.
نيجي لمرحلة 6 شهور الي سنة:
1- في المرحلة ديه الطفل غالبا بدأ يقعد لوحده وغالبا هيبدأ يزحف قريب وممكن يبدأ يمشي كمان. فـاول حاجة تتعمل إن الدنيا تتامن تماما! يعني ياما كل حاجة في البيت يتعمل ليها child proofing ياما تريح بالك وتعمل منطقة مؤمنه للطفل عن طريق حاجة ليها سور زي ديه كده:
https://amzn.to/2RkwkR2
ومش لازم تجيبها جاهزة, ممكن تعملها عند نجار ولا حتي تجيب مكونات وتعملها بنفسك
2- الطفل لو ناوي انه يكون ليه اوضة لواحده بعد كده, يبقي ده السن اللي تبدأ تنيمه في اوضة لواحده. اول مرة ممكن تكون صعبة وهيعيط كتير. لو أنت اكلته وشربته وغيرت ليه ومتأكد إن مفيش مغص ولا أي حاجة, اول مرة سيبه يعيط لو فضل ساعات حتي. بس اعرف حاجة. لو هتستسلم للعياط بعد نص ساعة ولا ساعة يبقي الافضل ماتجربش الموضوع أصلا علشان لو عملت كده, يبقي أنت علمت الطفل أسوأ درس في الدنيا اللي هيطلع عينك بقيت عمرك وهو انه لو عايز يجبرك على حاجة, يبقي يعيط علشان يوصل ليها. هتلاقي هنا دليل كامل لموضوع النوم ده علشان فيه أراء كتير:
https://bit.ly/2vbDOJC
3- في الفترة ديه تبدأ تشغل وقتة باللعب معاك أو تجيب ليه لعب مناسبة للسن بتاعة. ودلوقتي معظم اللعب بتلاقي مكتوب عليها مناسبة لانهي سن. فيه العاب كتير معمولة علشان تنمي الذكاء عند الأطفال وتنمي المهارات الحركية بتاعتهم. ديه أنا هاسيبها الكل اب وام يقرروا المناسب على حسب الميزانية بتاعتهم.
4- بدل فيديوهات ديزني و توم وجيري وكلام ده اللي بنرمي الواد قدامه علشان قرفنا من العياط، ممكن نشوف حاجة من الاف البرامج الموجودة اللي ممكن تعلم الأطفال في مراحل سنهم الاولي لغات تانية غير اللغة الام. ده مثلا مثال ولو انه مش أحسن حاجة:
https://www.littlepim.com
هو عامة طبيا المفروض الطفل مايتفرجش على أي حاجة على أي شاشة طول ماهو اصغر من سنة ونص. لكن لو خلاص لازم يتفرج ومفيش قدامك غير كده, يبقي استعمل حاجة زي اللي في اللينك ديه افضل من إنك ترميه قدام يوتيوب ولا التلفزيون.
5- لما الطفل يبدأ يمشي، بلاش نركز على الالعاب اللي بتعمل موسيقي وبتضحك وكده وخلاص. فيه العاب كتير في أي مكان محترم بتاع العاب بيقسم الالعاب فيه لاعمار مختلفة وبيبقي فيه ألعب تعليمه كتير في حاجات زي العلوم والحساب وغيرهم. هي آه ممكن تكون اغلي سنه بسيطه، بس مش كتير. وعموما لو السعر مشكلة، ممكن تجيب تابلت من أول 400 جنيه (صيني) وفيه برامج بتؤدي نفس الغرض بالهبل ومعظمها ببلاش أصلا. معلش، اتعب شوية علشان تاخد حاجة نضيفه. وتاني, يفضل بلاش أي حاجة فيها شاشة في السن ده!
من سن سنة الي سن الحضانة:
1- نكمل في الحاجات اللي فاتت
2- نبدأ نزرع القيم في الطفل. القيم ديه ممكن تكون قيم دينية, ممكن تكون اخلاقية, ممكن تكون أي حاجة.
3- يتم ايجاد وسيلة للعقاب لما الطفل يغلط ويراعي إن الوسيلة ديه متكونش بدنية (يعني بلاش ضرب تحت أي ظروف) ولا تكون فيها جرح كرامة (يعني بلاش يتهزق قدام الناس). من افضل الطرق التربوية هي وسيلة ال time out. وديه هتلاقي عنها معلومات كتير هنا:
https://wb.md/2BOhrwk
العقاب زيه زي المكافأة بالضبط. مهم جدا علشان تقويم الطفل قبل ما تصبح الغلطه عاده عنده. من أهم مواصفات وسائل العقاب التربويه هي إنها متكونش بدنيه بحيث إنها تؤدي الي إن الطفل يبدأ يخبي اخطائه خوفا من العقاب، وتاني حاجة تكون متناسبة مع عمره. يعني ممكن وهو عنده 5 سنين نحرمه من انه يلعب بحاجة بيحبها لمده معينه (طبعا الحاجة ديه مينفعش تكون الهواية ولا أي حاجة من اللي قلناها فوق) ولما يبقي عنده 15 سنة، ممكن نحرمه من الخروج والفسح لفتره معينه
4- في الفترة ديه, الطفل بيكون فضولي لاقصي درجة. هتلاقيه بيسأل عن كل حاجة بشكل مستفز, لازم نراعي ده, ولازم نرد عليه باجابات منطقية تناسب سنه وبلاش الاجابات العايمة أو اللي مش مفهومة ليه! يعني لما يسألك مثلا ليه مينفعش ياخد لعبه زميلة بالعافية, بلاش اجابات من نوعية "علشان ربنا يحبك" علشان هو أصلا مش في السن المناسب علشان يفهم يعني ايه ربنا! لازم نكلمه بالحوار اكنك بالضبط بتكلم شخص بالغ مع استخدام لغة سهلة. يعني مثلا "علشان يا حبيبي اللعبه ديه بتاعته هو وهو بيحبها. أنت ترضي انه ييجي ياخد الدبدوب الاخضر بتاعك وماتشوفهوش تاني؟"
5- بلاش تحت أي بند اسلوب الكلام بتاع الأطفال في اننا نستعمل كلمات من نوعية "امبو" ونخنف واحنا بنتكلم والهبل ده! اتكلم مع الطفل بشكل طبيعي تماما زي ما بتكلم أي حد تاني بإستخدام نفس الكلمات اللي بنستخدمها مع الناس التانية. يعني بدل "امبو" نقول "مية" أو "تشرب مية" وبدل "يلا علشان مم" تبقي "يلا علشان تاكل". بلاش شغل الاعاقة الذهنية ده الله يكرمكم!
6- في الفترة ديه لازم نتكلم مع الطفل ونتكلم كتير. يعني مش كفاية نستنى لما هو يسأل ونرد عليه زي النقطه رقم 4, لأ, احنا نسبق بالكلام. "شايف يا حبيبي البتاع الاسود اللي طاير هناك ده؟ ده اسمه غراب. ده طائر ذكي جدا بس بيحب يخطف الحاجات وصوته عالي"
7- عدم الاجبار: مهم جدا في التربيه إن ماكُنش فيه اجبار على أي حاجة على الاطلاق. الكلام ده من أول اللبس (اجبار على لبس معين، على حجاب، الخ)، لحد التعليم (اختيار كلية معينه، تخصص معين، الخ) مرورا بالعلاقات الانسانيه (صاحب فلان، بلاش تصاحب علان، اتجوزي ترتان، الخ). الاجبار مش بيعمل أي حاجة مفيدة غير إن الطفل وخصوصا لما يوصل مرحله المراهقه، هيعمل اللي أنت بتجبره على عكسه من وراك. يعني البنت المحجبه أول لما تطلع من البيت، مش بس هتقلع الحجاب، لأ، كمان هيبقي عندها استعداد إنها تروح أي شاطئ في أي دولة اجنبيه وتقلع ملط هناك (ديه نماذج فعليه أنا قابلتها في حياتي)، يبقي الاجبار عمل إيه غير إنك بتلاقي بنات بتنزل من البيت بالنقاب وفجأة تتقفش في بيت من بيوت الدعارة؟!
هنبدأ ندخل المدرسة بقي. في المرحلة ديه, هنقسم المراحل العمريه اللي حضانة (ومعاها ابتدائي) واعدادي وثانوي
في الابتدائي (ومعاه الحضانه):
1- ابدا علم ولادك اهميه العلم. راقب كل حاجة بيعملوها. هات tablets في البيت ونزل عليها العاب من المليون لعبه تعليمية اللي موجودة على ال AppStore وال Google Store واعمل معاهم برنامج متكامل مليان ترفيه بس في نفس الوقت يعلمهم حاجة. يعني مثلا لو هنتكلم على حاجة زي الفيزياء, هتلاقي مصدر تعليميه ببلاش للأطفال زي ده:
https://goo.gl/4EdGqL
وهلم جرا (جوجل يبقي صاحبك في النقطة ديه)
2- اطلع بيهم رحلات علشان يشوفوا اللي بيتعلموه عملي. يعني مثلا لو في الاحياء كلمتهم على الدب, خدهم على جنينه الحيوان ووريهم الدب. لو درستهم درس تاريخي, خدهم على المتحف, وهكذا
3- اوجد ليهم هواية ونميها بشكل علمي. يعني ممكن تكون هواية موسيقيه مثلا, ممكن تكون رسم, ممكن تكون تصوير, وكل الكلام ده هتلاقي ليه مصادر ملهاش اول من اخر على الانترنت وكله ببلاش (ولو مستعد تدفع, هتلاقي مصادر أكتر وأكتر)
4- اوجد ليهم رياضة وشجعهم على التفوق فيها وانهم يحصدوا مركز كمان!
خلصنا من ابتدائي؟ نطلع على اعدادي:
1- في المرحله ديه, ابدا معاهم في علوم متقدمه. دلوقتي أنت عندك حل من اتنين. ياما تكمل بنفس النظام اللي فات وتعلم كل حاجة بنفسك بمساعدة وسائل مجانيه زي اللي فاتت, يعني مثلا لو هنتكلم على حاجة زي النظرية النسبيه, هتلاقي مصادر كتير لتعليمها للاطفال:
http://shorturl.at/nsw23
أو الحل التاني بما إنك بقالك بتاع 5 سنين بتوفر 150 ألف كل سنة, هو إنك تنقي أكتر معيد أو خريج من كلية زي علوم ويديلهم دروس خاصة في البيت ملهاش علاقة باللي بياخدوه في المدرسة. يبدأ يركز معاهم في حاجات زي ميكانيكا الكم, النسبية, نظرية التطور, يتعلموا حاجات متقدمه في البرمجه, يبدأوا في لغات جديدة, الخ.
2- تبدأ تطلب منهم يعملوا ابحاث عن طريقها يتعلموا البحث العلمي. تطلب منهم مثلا يعملوا تقرير عن إيه اللي استفادته البشريه من حاجة زي النظريه النسبيه, ويتعلموا يعني إيه مصادر, وإزاي يحددوا كفاءه المصدر الصح من الأي كلام.
3- تبدأ تسافر معاهم أكتر وأكتر ويطلعوا بره مصر ويحتكوا بثقافات مختلفة (أنت لسة موفر 150 ألف, ابدا استعملهم بقي)
4- ابدا خليهم يعتمدوا على نفسهم في الناحية المادية. يعني حد فيهم مثلا محتاج تليفون جديد؟! جميل. أنت هتدفع 50% بس من تمنه وهو عليه الباقي ويتصرف فيهم ويشتغل مش عيب
هتجي عند المرحله الثانويه هتلاقي معاك شاب عبقري بكل معني الكلمه. في المرحله ديه هتكمل اللي كنت بتعمله قبل كده وفي نفس الوقت, هو هيكون عنده الكفاءة الكافية انه يلتحق بانضف تعليم حقيقي في مصر وهو مدارس المتفوقين STEM:
تقدر تعمل كل ده؟! ولا بتخلف وبس؟! أصل الخلفة العائق بتاعها مش بس إنك تقدر تصرف, بس قبل ده إنك تقدر تربي. هتعرف تربي ولا هتفضل ماشي في دوامه: "أصل المدارس الدولية حراميه" والكلام ده؟!
هتعرف تتحل من مجرد "راعي" الي "مربي" ؟!
شوية مصادر:
