كان فيه بوست منشور لدكتور بينتقد الناس اللي بتتعلم على حساب الدولة وتسافر وتشتم فيها, ولقيت بعدها دكتور عايش في بريطانيا وبيرد عليه على أساس انه غلطان وكده.
ويبقي السؤال الذهبي: هل أي حد اتعلم في مصر مديون لمصر فعلا؟
علشان نجاوب على السؤال ده, نشوف كده الأخ اللطخ بتاع بريطانيا ده كان شايف انه مش مديون لمصر ليه
ملخص كلامه كان:
اولا: هو صرف فلوس كتير جدا على الدروس الخصوصيه في الجامعة
ثانيًا: لما سافر بريطانيا, لقي فرق ما بينه ومابين الاطباء اللي هناك وكان لازم يبذل مجهود مضاعف وكده
وشوية نقط تانية ملهاش أي ستين لازمة صراحة. نرد على النقطتين دول
بخصوص أول نقطة, الطالب المصري عنده هبل في راسه مخليه مقتنع إن الجامعة زيها زي المدرسة في انه لما يروح هناك, هيبقي فيه حد بيشرح بالتفصيل ويديله واجب وكده!
الجامعة مكان بحثي صرف. مفيش فيه الهبل ده. الجامعة وظيفتها إنها تفتح ليك المجالات وتفتحلك الأبواب وبس. والمفروض إن سيادتك اللي تكمل مع نفسك وتذاكر وتبحث.
أي حد بياخد دروس في الجامعة ياما حمار ياما بيستسهل. أنا مثلا في كليتي كان فيه ناس بتاخد دروس في كل حاجة تقريبا. أنا عمري ما أخدت درس في أي حاجة وسبحان الله نجحت عن أي حد كان بياخد دروس تقريبا بدون أي استثناء!!!
تاني حاجة هو مصاريف الدروس ديه أصلا تعتبر فلوس؟!!!
الشخص في انجلترا وامريكا وتقريبا معظم دول الكوكب, بيفضل يدفع ضرائب مهوله طول حياته ومع ذلك, ييجي يدرس حاجة زي طب, يلاقي نفسه مديون بفلوس ملهاش أول من آخر! أنت عايز تقارن شوية الملاليم اللي دفعتها في الدروس (واللي مكنتش المفروض تدفعها أصلا لو عندك مخ) بالمصاريف اللي بيدفعها أي طالب زيك بره؟!
نيجي بقي على ثانيًا, طبيعي لما تسافر من دولة للتانية فيه مجالات معينه لازم تعمل معادلة فيها. منها الطب والهندسة المعمارية. سيادتك لو جاي من امريكا هتعمل معادلة برضه.
اقلك الثقيله؟! أنت لو دكتور في امريكا في ولاية معينه وعايز تروح تشتغل في ولاية تانية, هتحتاج تقدم على ترخيص تاني وتعمل حاجة زي معادلة مابين الولاية الاولي والتانية الا لو فيه اتفاقية مابين ولايتك والولاية التانية!
لكن حد بيهمه الكلام ده؟!
وأكيد الدكتور البغل اللي بقاله سنين في انجلترا عارف الكلام ده بس هو اختار سكه انه يكون افاق ويكذب عادي!
الخلاصة, أنت في مصر بتاخد تعليم غيرك بيدفع فيه بره عشرات إن لم يكن مئات من الالاف من الدولارات ببلاش!
سيادتك مش بتدفع ضرائب ولو دفعتها, بتدفع اقل نسبة تذكر على الكوكب. ده غير إنك مش بتدفع تقريبا أي حاجة مصاريف مباشرة في التعليم!
كفاية حمورية بقي!
ليست هناك تعليقات:
إرسال تعليق